Stjörnuhlaup Sport24

Stjörnuhlaup Sport24 - laugardaginn 16. maí 2026

Stjörnuhlaupið hefur verið árlegur viðburður í Garðabæ síðan 2012 sem sameinar keppnisanda, gleði, hreyfingu og útivist. Hlaupahópur Stjörnunnar er framkvæmdaraðili hlaupsins.

Boðið er upp á fjórar vegalengdir sem henta bæði byrjendum og reyndari hlaupurum og liggja allar hlaupaleiðirnar um fallega stíga Garðabæjar megin í Heiðmörk í einstöku landslagi og umhverfi. Stjörnuhlaup Sport24 er almenningshlaup fyrir alla sem vilja hreyfa sig og njóta fallegrar náttúru í leiðinni.

Jafnframt er boðið upp á skemmtiskokk fyrir alla aldurshópa. Ágóði af skemmtiskokkinu rennur til Minningar- og styrktarsjóðs Arnarins í Garðabæ.

Stjörnuhlaup Sport24 fer fram laugardaginn 16. maí kl. 10:00 frá íþróttahúsinu Miðgarði.

Þátttökugjald:

• 11 km kr. 6.500.  Þátttökugjald hækkar í 7.500 eftir miðnætti  7. maí.
• 17 km kr. 7.000.  Þátttökugjald hækkar í 8.000 eftir miðnætti  7. maí.   
• 22 km kr. 7.500.  Þátttökugjald hækkar í 8.500 eftir miðnætti  7. maí.  
• Skemmtiskokk 2 km kr. 3.500. 

Athugið: Hægt er að skrá sig á staðnum í Miðgarði um morguninn laugardaginn 16. maí frá kl 8:00 til 9:00. Eftir kl. 9:00 er lokað fyrir skráningu.

Afhending gagna:

• Fim.  14. maí  frá kl. 13:00-18:00  í verslun Sport24, Miðhrauni Garðabæ.
• Fös.  15. maí  frá kl. 13:00-18:00  í verslun Sport24, Miðhrauni Garðabæ.
• Lau.  16. maí  frá kl.   8:00-  9:00  í íþróttahúsinu Miðgarði Garðabæ.

Nafnabreytingar:

Mögulegt er gera nafnabreytingu fram á föstududag 15. maí  til kl.18:00.

Um hlaupið:

• Dagsetning og tími: Laugardaginn 16. maí 2026 kl. 10:00.
• Staðsetning: öll hlaup byrja og enda við íþróttahúsið Miðgarð í Garðabæ.
• Hlaupið er utanvegahlaup í Heiðmörk.
• Hlaupaleiðir 11 km, 17 km og 22 km veita ITRA stig.
• Skemmtiskokkið fer fram á malbikuðum stigum. Ræsing kl. 10:15.

Hlaupaleiðir:

   Myndband af hlaupaleiðum og nýju 17km leiðinni 

   11 km (Garmin) / 22 km (2 hringir) 

   17 km (Garmin) 

Aðstaða við íþróttahúsið Miðgarð:

Aðstaða fyrir þátttakendur er eins góð og best verður á kosið. Gott aðgengi að salernum, örugg geymsla fyrir verðmæti á meðan hlaupið stendur, upphitun fyrir hlaup og teygjur eftir hlaup við kjöraðstæður. Næg bílastæði eru við Miðgarð. Fyrir þá sem kjósa, er einnig hægt að skola af sér eftir hlaup. Að loknu hlaupi er boðið upp á veitingar fyrir þátttakendur við kjöraðstæður.

Drykkjarstöðvar:     

Drykkjarstöð er á leiðinni við nýja skátaheimilið í Heiðmörk (tæpir 6 km frá Miðgarði).

·        Önnur drykkjarstöð er við gaflinn að austanverðu við Miðgarð á 22 km vegalengdinni, þegar hlauparar eru hálfnaðir.

·        Á 17 km vegalengdinni koma hlauparar aftur að drykkjarstöðinni við skátaheimilið.

11 km og 22 km hlaupaleiðirnar:

Allar leiðirnar 11 km,17 km og 22 km eru viðurkenndar af ITRA og hlauparar sem klára innan 3 klst fá ITRA stig fyrir hlaupin, sem meðal annars gilda fyrir Laugavegshlaupið.

Rás- og endamark er við íþróttahúsið Miðgarð, sem stendur við golfvöllinn í Vetrarmýrinni. Hlaupaleiðin liggur í landi Vífilsstaða og Heiðmörk og m.a. um útivistarskógana í Smalaholti og Sandahlíð. Brautin er í hækkunarferli um hóla og hæðir fyrstu 5,5 km, með hæsta punkt í 150 m hæð frá Miðgarði. Hæsti punkturinn er í hlíðinni ofan við nýja skátaheimilið. Leiðin þaðan er nánast öll niður á við og skörp og löng lækkun er niður nýja stíginn að Vífilsstaðavatni. Samanlögð hækkun brautarinnar á 11 km er um 200 m.

17 km hlaupaleiðin:

17 km leiðin liggur líka að nýja skátaheimilinu Vífilsbúð í Heiðmörk á sömu braut/leið eins og 11 km og 22 km brautirnar. Í stað þess að beygja til hægri við skátaheimilið í átt að Vífilsstaðavatni, er farið til vinstri inn á nýjan stíg við skátaheimilið og hlaupið suður-austur að Heiðmerkurvegi og meðfram honum, og komið efst inn á göngustíginn við Vífilsstaðahlíð þar sem nýju bílastæðin eru.

Hlaupið er niður eftir og meðfram Vífilsstaðahlíð og beygt til hægri upp grófa malarbrekku í átt að skátaheimilinu aftur þar sem vatnsstöðin er. Þar sameinast 17 km leiðin aftur við 11 km leiðina þegar beygt er til vinstri í átt að Vífilsstaðavatni á leið í Miðgarð. Þessi nýi hringur eða „hjartað“ á mynd er 6 km að drykkjar stöðinni aftur. Heildarhækkun er 330 metrar. 

Skemmtiskokk 2 km:

Skemmtiskokkið er hlaupið eða gengin á malbikuðum göngustígum rétt við Miðgarð. Skemmtiskokkið byrjar endar er við íþrótthúsið Miðgarð. Skemmtiskokkið er eitthvað fyrir alla og á hvaða aldri sem er, fyrir vini og vinahópa, mömmur og pabba með kerrur og alla sem vilja taka þátt skemmtilegum hlaupaviðburði og hreyfa sig. Ágóði af skemmtiskokkinu rennur til Minningar- og styrktarsjóðs Arnarins í Garðabæ sem styður börn og unglinga sem misst hafa náin ástvin.  

Stígar, undirlag og verndun umhverfis:

Undirlag allra stíga á öllum vegalengdum er ekki torfært, heldur þjappaðir moldarstígar eins og eru víðast hvar í Heiðmörk, hestastígar að hluta og góðir malarstígar.

Framkvæmdaraðili (Hlaupahópur Stjörnunnar) og Skógrækt Garðabæjar biður þátttakendur að skilja ekkert eftir sig í náttúrunni eins og umbúðir og annað í brautinni. Hægt er að losa sig við það á drykkjarstöðinni við skátaheimilið/drykkjarstöð í Heiðmörk eða á marksvæðinu.

Nánari upplýsingar um Stjörnuhlaupið:

Facebook: Stjörnuhlaup Sport24

Instagram: Stjörnuhlaup Sport24

Fyrirvari:

Skráðir hlauparar sem taka þátt í Stjörnuhlaupi Sport24 eru alfarið á eigin ábyrgð og börn eru á ábyrgð foreldra. Framkvæmdaraðili hlaupsins, Hlaupahópur Stjörnunnar (Stjarnan), getur á engan hátt verið ábyrgur fyrir skaða sem skráðir hlauparar hugsanlega verða fyrir eða valda öðrum meðan á þátttöku í hlaupinu stendur. Jafnframt áskilur framkvæmdaraðili sér rétt til að breyta leiðum ef öryggi þátttakenda er ógnað og ef ómöguleiki er til staðar. Með skráningu í þennan viðburð staðfestir þátttakandi skilning á þessu og samþykkir þennan skilmála ásamt öðrum almennum skilmálum hér á síðunni.