Álafosshlaupið 2025

Álafosshlaup Scarpa verður haldið fimmtudaginn 12. júní, í Mosfellsbæ og verður ræst kl. 18:00. Hlaupið verður frá Varmárvelli um austursvæði Mosfellsbæjar og býður Mosfellsbær öllum þátttakendum í sund í Varmárlaug að hlaupi loknu.

Vegalengdir

Boðið verður upp á 2 vegalengdir, u.þ.b 5,6 km og u.þ.b 10 km. Tímataka er með flögutímatöku.

Skráning

Forskráning fer fram hér á netskraning.is. Einnig verður hægt að skrá sig á staðnum fyrir hlaup. Athugið að skráning á netinu er ódýrari en skráning á staðnum.

Afhending hlaupagagna

Afhending hlaupagagna fer fram í verslun Fjallakofans frá mánudeginum 10. Júní og til hádegis á hlaupadag. Einnig verður hægt að sækja hlaupagögn á hlaupadegi 12. júní í Vallarhúsinu við Varmárvöll frá kl 17:00.  Þau sem geta eru hvött til að sækja gögn í Fjallakofann til að létta á álagi á hlaupadegi.

Þátttakendur sem velja að kaupa sérmerkta þátttökumedalíu á 1.000 kr. geta sótt hana til sjálfboðaliða í Vallarhúsinu við markið strax eftir að þau ljúka hlaupinu.

Verð

17 ára og eldri: 3.900 kr. (4.900 kr. ef skráð á staðnum) 

16 ára og yngri: 500 kr. (1.500 kr. ef skráð á staðnum)

Þátttökumedalía: 1.000 kr. pr. Medalíu.

Þess ber að geta að allur ágóði hlaupsins fer í barna og unglingastarf frjálsíþróttadeildar Aftureldingar.

Aðstaða

Hægt er að geyma töskur í Vallarhúsi við Varmárvöllinn. Búningsaðstaða er við sundlaug Varmár (Íþróttamiðstöð) og ókeypis er í sund fyrir þátttakendur eftir hlaupið í Varmárlaug.

Hressing verður í boði fyrir alla hlaupara að loknu hlaupi við markið.

Verðlaun

Veitt verða verðlaun fyrir fyrstu sætin í báðum flokkum. Útdráttarverðlaun verða veitt en dregið verður úr hlaupanúmerum. Listi með útdregnum númerum verður í Vallarhúsinu eftir hlaup og hvetjum við alla til að athuga hvort þeirra númer hafi hlotið útdráttarverðlaun.

Upplýsingar

Frekari upplýsingar er hægt að fá hjá Teiti Inga í síma 842 2101 eða með fyrirspurn á netfangið frjalsar@afturelding.is .

Einnig er hlaupið með Facebook síðu og þar er hægt að senda inn fyrirspurnir.

Hlaupaleiðin

Hægt er að sjá hlaupaleiðina hér neðst á þessari síðu.

Líklega er best að kalla þetta Hybrid hlaup. Hlaupið er eftir merktum leiðum, göngustígum og malarvegum. Það byrjar á malbikuðum göngustíg uþb 1 km. Síðan taka við skógarstígar, aftur smá malbikskafli, þá malarvegur, reiðgötur osfrv. Á brattann er að sækja fyrri helming en síðan er farinn malarvegur eða stígar niður í mót. Drykkjarstöð verður á 10 km leiðinni. Heildarhækkun í 10 km brautinni er um 130 metrar.

Hlaupið er frá Varmárvelli framhjá knattspyrnuvelli Aftureldingar, gegnum útivistarsvæði Mosfellinga við Stekkjarflöt (aparóló) og fram hjá Álafossi sjálfum. Áfram er haldið upp í gegnum Reykjalundarskóg og framhjá Reykjalundi. Þaðan er hlaupin gatan Engjavegur og göngu/reiðstígur í framhaldi upp á Bjargsveg.  Hér skiptast leiðir og þeir sem velja styttri vegalengdina þræða sig til baka á stíg meðfram Varmá. Stígurinn er torfærinn fyrstu u.þ.b. 200 metrana, mikið hefur runnið úr honum í vorleysingunum og talsvert er um trjárætur og stubba sem standa uppúr stígnum. Hér þarf því að fara mjög varlega. Áfram er svo hlaupið meðfram Varmánni og markið er við Varmárvöllinn á sama stað og ræst var.

Þeir sem ætla lengri leiðina hlaupa Bjargsveginn að Varmá og beygja þar til vinstri inn hjá útihúsum Reykjabúsins. Þar fyrir ofan er farið yfir Varmá á brú og hlaupið upp brekkuna í átt að Reykjaborginni. Þegar komið er upp fyrir byggð er beygt til hægri og hlaupinn göngu/reiðstígur meðfram Hádegisfelli, fram hjá svæði Skógræktarfélags Mosfellsbæjar í átt að Hafravatni. Þegar komið er að Hafravatnsvegi er beygt til hægri og hlaupið upp brekkuna að drykkjarstöð. Eftir drykkjarstöðina er haldið áfram í átt að Úlfarsfelli á malarvegi að Skarhólabraut, hún er þveruð og hlaupið að Krikahverfi. Þar fer loks að halla undan fæti og stígurinn hlaupinn undir Reykjaveginn í nýju göngunum og þaðan beina leið áfram stíginn aftur niður að Stekkjarflöt. Þá verður hlaupið í mark við Varmárvöllinn aftur á sama stað og ræst var.

Sjá hlaupaleiðina á Relive.

Saga hlaupsins

Álafosshlaupið er sögufrægt hlaup sem fyrst var hlaupið árið 1921 að frumkvæði Sigurjóns Péturssonar á Álafossi og hefur verið haldið með hléum síðan. Framan af var hlaupið á milli Álafoss og Melavallarins í Reykjavík, síðan færðist hlaupið í nágrenni Álafoss. Kveikjan var sigling Einars Péturssonar, bróður Sigurjóns, um Reykjavíkurhöfn á kappróðrarbáti sínum með hvítbláa fánann í skut þann 12. júní 1913. Fáninn var tekinn í vörslu danskra varðskipsmanna. Hermt er að atburðurinn hafi hleypt auknum krafti í sjálfstæðisbaráttu Íslendinga á þeim tíma. UMFÍ tók fánann síðar upp og gerði að sínum.

Frjálsíþróttadeild Aftureldingar þakkar styrktaraðilum hlaupsins kærlega fyrir stuðninginn.